Peto de ánimas do cemiterio dos Eidos

Non se pode saber con certeza a data de realización do peto de ánimas orixinal, xa que este, de madeira, foi roubado a principios dos anos 90 do século pasado. Posiblemente poida ser da década de 1860, de acordo coa documentación conservada. En 1995, o canteiro José Antonio Sueiro Portela tallou en pedra un novo exemplar, seguindo a iconografía do anterior. Este canteiro formado en Poio especializouse na elaboración de cruceiros e traballou na restauración da varanda de pedra da catedral de Santiago, na praza das Praterías, ou na reposición do monumento aos mártires de Sobredo en Guillarei, así como tamén participou no taller onde se insculpía o conxunto monumental da praza das Travesas de Vigo, de Silverio Rivas.

Este peto de ánimas está situado no muro da parte posterior da capela do cemiterio dos Eidos. O nicho do peto de ánimas é aberto e está entre dúas columnas redondas embebidas nas paredes laterais do retablo, que sosteñen unha arquitrabe sobre a que vai unha cornixa. Da cornixa parte un arco de medio punto que contén no seu interior a seguinte inscrición sobre un fondo negro: “UNA LAGRIMA POR UN MUERTO SE EVAPORA / UNA FLOR SOBRE UNA TUMBA SE MARCHITA / UNA ORACION POR SU ALMA LA RECOGE DIOS. S. AGUSTIN”.

O retablo amosa a Cristo crucificado e, debaixo del, entre as chamas, o papa, un cura, un bispo, un frade e unha monxa. É curioso que todas sexan figuras relixiosas, cando o común é que tamén aparezan fieis leigos e mesmo representacións de reis.


Na parte inferior, base do peto de ánimas, está o esmoleiro onde se depositan as esmolas para misas de sufraxio das ánimas.


Os petos de ánimas

Os petos de ánimas son pequenos templetes que aparecen repartidos ao longo de toda a xeografía galega. No concello de Redondela existen dez petos de ánimas e dous esmoleiros. Os esmoleiros son pola devoción dunha figura relixiosa e os petos son pola devoción das ánimas.

Estes templetes presentan figuracións de ánimas penando no lume do purgatorio. Están representados todos os estratos sociais, desde os reis ata os simples fregueses pasando por todos os cargos e dignidades da Igrexa.

Sobre todos eles adoitan aparecen as figuras ás que rezaremos para que intercedan na salvación das ánimas do purgatorio: Xesús crucificado, a Virxe María ou un frade, normalmente franciscano.

Publicacións populares deste blog

Paseo da Portela

Imaxe
MIRADOIRO Achegámonos a este punto desde onde contemplar a desembocadura dos ríos Alvedosa e Pexegueiro e a entrada na enseada de San Simón. Tamén podemos ver unha importante variedade de fauna asociada a este tipo de contorna natural intermareal. Este agradable paseo de madeira levaríanos ata o barrio da Portela percorrendo toda a beira da enseada, unha ruta que tamén invitamos a realizar para completar a nosa visita á vila de Redondela. (imaxe interactiva) DIQUES Desde a confluencia dos dous ríos ata a punta da Portela, na entrada da enseada, discorren dous diques paralelos de pedra que teñen como función principal a canalización da corrente fluvial. Cando se construíu, a comezos do s. XX, a intención era facilitar o calado para a navegación de navíos na entrada do porto de Redondela e evitar así as perigosas barras que hoxe podemos ver en marea baixa, formadas pola achega de sedimentos dos ríos Pexegueiro e Alvedosa. Desde o século XVI a intensificación da deforestación, coa consecu...
Ler máis

Porta da Vila

Imaxe
Podemos entender que para un lado e outro desta porta discorría a antiga muralla que envolvía o centro histórico. Cara ao oeste desapareceu baixo as novas edificacións, mais cara ao leste aínda se conserva parte do lenzo da muralla, subindo pola rúa Telmo Bernárdez, quizais non orixinal na súa totalidade. PORTAS DA VILA En total había seis portas ao longo do perímetro da muralla. PORTA DA VILA: situada ao norte, fronte a entrada do barrio da Farrapada, como xa describimos antes. Era a saída norte da vila, o antigo Camiño Real que nos leva para Santiago. Hoxe en día dá acceso á rúa Isidoro Queimaliños e ten a súa saída no outro extremo pola antiga porta do Val, ao carón da actual casa da Torre. PORTA DO ESTALEIRO: está orientada cara ao oeste, onde remata a rúa Reveriano Soutullo na súa confluencia coa praza da Constitución. Esta praza, na antigüidade tamén se chamou praza do Estaleiro. Entrando por esta porta e percorrendo a actual rúa de Reveriano Soutullo chegariamos á outra antiga...
Ler máis

Aparcadoiro e inicio

Imaxe
APARCADOIRO: Este aparcadoiro libre discorre ao longo da beira do río Alvedosa e remata ao carón da depuradora de augas. (imaxe interactiva) FEIRA: Esta explanada é un dos lugares habilitados para a feira que se celebra os días 6 e 21 de cada mes. A feira é diversa, con postos de roupa e complementos, flores, alimentos, plantas e ferramentas agrícolas. As feiras de Redondela constan en diferentes documentacións dende o século XVII en diante. A periodicidade de celebrala o 21 de cada mes data xa do ano 1838. O día 6 foi incorporado a partir de 1923. Ata que a lexislación prohibiu a venda de animais nas feiras, Redondela contaba tamén coa feira de gando máis importante da bisbarra. MARISMA E RECHEO: Ata mediados do século XX todo o que se ve ao noso arredor era unha marisma formada na confluencia da desembocadura dos ríos Alvedosa (que atravesa o centro da vila) e o río Pexegueiro (que provén da zona alta da parroquia do Viso e desemboca pola beira norte da depuradora. Quedan restos do q...
Ler máis